هوا دا جوان وش سلندر و الا ايه :(

الموضوع باختصار كالاتي :
امبارح :
العربيه بتسخن بس مش جامد يعني رحت غسلت دوره المياه في البنزينه بالجهاز دا و غيرت الميه بالميه الخضرا و اللي مكنتش بحطها قبل كدا و الراجل خد الهوا من العربيه
النتيجه زي الفل لمده 3 ساعات و بعد كدا العربيه مع التكييف جابت ال 100 و كانت بتعدي فلما خدت بالي وقفت و قفلت التكييف و مشيت و العربيه طول اليوم 90 مش بتزيد قلت الحمد لله
النهارده :
العربيه بتسخن بسرعه و بتجيب 95 و 100 المهم رحت نضفت الريداتير بالهوا هوا و السربنتينه و مسدس ميه و بتاع و قلت الحياه هتحلو درجه الحراره بقت تجيب 100 و عايزه تعدي المهم بفتح القربه ملقتش فيها ميه زودتها و العربيه شغاله و روحت المهم عدي عليا واحد صاحبي بيفهم شويه في العربيات و قالي دور العربيه و زود ميه و قد كان لقيت الميه بتنط من القربه و في هوا طالع معاها صاحبي قالي دا جوان وش سلندر :K_crying[1]: الكلام دا صح و الا غلط و لو صح اعمل ايه و هتتكلف كام ؟

فيكترا 99

طبعاً لأ
ده العربية فى هوا دخل الدايرة سيبها دايرة و مشوار حلو و افتح غطا القربة بالراحة هتلاقى هوا اقفل بعد ما يطلع و اعملها لغاية ما تتظبط و ممكن ترموستات الكوعه بيبقى معلق
الجوان اعراضه
1. الزيت طحينه سواء فوق او تحت
2. دخان بخار ماية من الشكمان بكثافة
3. نقص شديد فى الماية لدرجة المشوار ازازة ماية لتر و نص
4. ضعف شديد فى قدرة العربية

لو الزيت سليم ........فأنت محتاج تعيد الرباط على وش السلندر تانى .....لأن فيه عندك تفويت خفيف للكبس من بين الرأس والبلوك ....بيهرب لمية التبريد ......وفيه بعض الميه بتنزل للغرف برضه وبتطلع مع العادم ( من الآخر أربط رأس السلندر تانى وجرب ) لو الحال بقه تمام بعد الرباط الصح بالترتيب المعروف فى رباط الجوان يبقى خير وبركه ..........لو الوضع فضل زى ماهو دلوقتى حتحتاج تغير جوان رأس السلندر

تمام يا باشا

السلام عليكم ورحمه الله .. انت عندك تسريب في دوره الميه بيدخل هوا ويرفع الحراره فقط والحل انك تراجع الخراطيم والقفزان كلها وشيك علي غطاء القربه وبرده احيانا بيبقي التسريب من خرطوم التكييف السخن لو ما كنتش فاصله شوف كده واحنا معاك بس ياريت كل واحد عنده مشكله يكتب بيانات عربيته كامله ( نوعها- موديل - حالتها..) علشان يبقي الكلام مظبوط .

انت فين يا باشا؟ واحشنا يا ا سمير والله . اسمحلي يا باشا هو ما ذكرش في كلامه ان الميه اختلطت مع الزيت في القربه ولا في ميه من الشكمان . فليه حضرتك فرضت انه جوان وش سلندر ؟!!

فادى حبيب قلبى كده اغيب و متسألش عليا واحشنى

اقتباس:

---

المهم بفتح القربه ملقتش فيها ميه زودتها و العربيه شغاله

---

برضه جرب كده ....بعد ما العربيه تسخن .....لو لقيت غطاء القربه بيطلع بخار ميه من حواليه وأنت فاتح الكبوت ......يبقى الغطاء وحش فعلا وعاوز يتغير .........ولو لقيت الميه مابتنقصش من الغطاء ومفيش بخار طالعه من القربه ...........يبقى أربط رأس السلندر...........وطبعا لالزم تكون واثق أن مفيش ميه ظاهره خارجيا من الخراطيم وخلافه

اقتباس:

---

المشاركة الأصلية كتبت بواسطة hellboy

انت فين يا باشا؟ واحشنا يا ا سمير والله . اسمحلي يا باشا هو ما ذكرش في كلامه ان الميه اختلطت مع الزيت في القربه ولا في ميه من الشكمان . فليه حضرتك فرضت انه جوان وش سلندر ؟!!

---

الله يخليك يا فادى باشا .....وخللى بالك ....المهم أنه يعرف الميه بتروح فين ......هل لما الميه بتغللى والقربه بتفور ....الميه بتطلع من حول الغطاء فى صورة بخار مثلا ( زى اللى بتطلع من حوالين غطاء براد الشاى )وفى الحاله دى الغطاء هو اللى حيبقى وحش ............لو ماشفش الحته دى ......يبقى الميه بتهرب من الشكمان بسبب تفويت خفيف من بين الرأس والبلوك .....وممكن مايشوفوش والعربيه ماشيه ......لأن ضغط الكبس بيبقى كبير فى الحاله دى وبيفتح الخلوص الموجود بين الرأس والبلوك ....أنما لما بيوقف العربيه ضغط الحريق بيقل ....وممكن مايشوفش البخار وهو طالع من الشكمان ....................!!!!!!!!!!!!!!!! ولكن ممكن يشوفه برضه من عند الشكمان وهو واقف ......لو عمل شوية أمبيلهات جامده شويه ( اللى هى حالة التفويت من بين الرأس والبلوك ) تمام كده

ربنا يخليك يا طناني ويديم علينا المعروف بس انا موجود ورديت عليك في موضوع ( غالبا كولنت سنسور ) باماره ما هتنزل ان شاء الله الجمعه الحرفيين - ربنا معاك يا حبيبنا .

سمير باشا انا شاكك فى طرمبة الماية

طيب شفت موضوع التكييف و رد عليا

مشكور يا ا سمير . ربنا يباركلك .

اقتباس:

---

فليه حضرتك فرضت انه جوان وش سلندر ؟!!

---

فى بعض الأحيان لما بيحصل أستطاله بسيطه لمسامير رأس السلندربسبب ضغط غازات الحريق على وش السلندر من تحت ......بيتفتح خلوص بسيط بين الرأس والبلوك وبكده بيحصل تفويت لغازات الحريق للميه وده بيخللى الميه تفور فى القربه فى جميع الأشواط (الضغط بالذات ) ....وفى شوط السحب بعض الميه الخفيفه بتنزل للغرف برضه وده اللى بيبان من الشكمان ........على حسب الضغوط اللى بتكون فى الغرف

اقتباس:

---

المشاركة الأصلية كتبت بواسطة tananybasha

سمير باشا انا شاكك فى طرمبة الماية

---

عيب الطلمبه هيبان معاه .....والميه حتنزل من تحت غطاء الكاتينه .....بس اللى حيحصل أن المكنه حتسخن علشان الميه قلت .....بس مش حتفور فى القربه ....الا بالأسباب اللى قولناها قبل كده

اقتباس:

---

المشاركة الأصلية كتبت بواسطة tananybasha

طيب شفت موضوع التكييف و رد عليا

---

حشوفه يامحمد وأرد عليك أن شاء الله

اقتباس:

---

المشاركة الأصلية كتبت بواسطة hellboy

مشكور يا ا سمير . ربنا يباركلك .

---

الله يخليك يافادى باشا ............

و الطرمبة تعمل فوران فى الماية لو فيها تفويت او تنفيس عن تجربة برضو يا سمير باشا و تنقص الماية و تبهدل الدايرة

اقتباس:

---

المشاركة الأصلية كتبت بواسطة hellboy

انت فين يا باشا؟ واحشنا يا ا سمير والله . اسمحلي يا باشا هو ما ذكرش في كلامه ان الميه اختلطت مع الزيت في القربه ولا في ميه من الشكمان . فليه حضرتك فرضت انه جوان وش سلندر ؟!!

---

اللي خلاني افترض كدا يا باشا ان العربيه و هيا شغاله و القربه مفتوحه لقيت الميه بتتنطر من القربه و طالع مع الميه دي هوا

ممكن يكون ترموستات الكوعه

تم الاتي :
رحت لي واحد اسمه وليد اوبل في السابع و قالي ترموستات الكوعه قافل و مش بيفتح و نشيله خالص و قد تم و العربيه اتظبطت و لما مشيت مفيش 10 دقايق و العربيه سخنت تاني و وصلت ل 100 رجعتله قالي كدا كهربائي لازم يبص علي دوره المراوح و بعت جاب كهربائي قعد يلعب في شويه سلوك كدا و طلعنا نجرب العربيه لقيت العربيه زي الفل المهم سالته كان في ايه بقي قال الاتي : السرعه التالته بتاعت المروحه اللي قدام مكانتش بتشتغل " انا كنت قريت في المنتدي هنا ان المروحه دي سرعتين بس " " بس فعلا سرعه المروحه بقت سريعه جدااا عن الاول و كانت بتشتغل سرعتين و انا كنت بتاكد من كدا بنفسي فا الموضوع دا حيرني قوي بجددددددد " يعني السرعتين اللي كنت بشوفهم مش زي اللي شغاله دلوقتي تفتكروا ايه السبب "؟؟؟


تاني حاجه و اللي محيراني و حيرته هوا شخصياااا ان العربيه بتبقي حرارتها كويسه نقول مثلا 85 يادوب ادوس علي زرار التكييف الاقي الامبير بيطلع لفوق مره واحده كدا بتاع 5 درجات !!!!!! بجد هتجنن و هوا كان هيتجنن اصلا و مش عرفلها حل يا تري دا ايه علشان الموضوع دا بجد هيهبلنييييييييييييييييييي يييييييييييييييييي



اسف علي الاطاله و شكراااا

صحبك دا متخلهوش يحط ايدو فى العربية يركب جنبك بس لان موضوع طلوع مية مع هو من الاقربة دا معناة الوحيد ان غطا الاقربة بايظ

ياريس الى لعب فى السلوك معملش سرعه تالته لا صوت المراوح على
البيه عملك مروحه التبريد على سرعتها التانيه دايريكت
يعنى لغى السرعه الاولى نهائى وشغلها على السرعه التانيه
والسرعه التانيه بتشتغل من بعد ما السرعه الاولى تبقى شغاله ولما السخونيه تزيد شويه بتشتغل معاها مروحه التكييف ولو الحمل على العربيه كبير شويه او بتسخن اوى بتشتغل مروحه الريداتير على السرعه التانيه الى هو ساعتها بتبقى 3 سرعات سرعتين ريداتير وسرعه تكييف
الحق اظبط تانى المراوح علشان السرعه التانيه مبتشتغلش الا قليل وساعتها بتاثر على البنزين وعلى المروحه نفسها من ماتورها او من الريش ممكن تتكسر

والى انا شاكك فيه من عندك وبيزيد سرعه الحراره ان الريداتير تقريبا فيه كسر او شرخ بيطلع الميه منه وهى مغليه وبتقابل البروده الى فى الجو وتتبخر والشرخ دا الى اكيد منه انه من الكوعه الى جايه من عند الماتور وداخله على الريداتير

مش عارف انا تهت ليه يمكن عايز انام

انسى ياباشا كل الكلام دة صاحبك قالك المفيد العربية جابت جوان وش السلندر والسبب هو انك غسلت دورة التبريد فى البنزينة وهمة بيحطو مواد كيميائية بتتفاعل مع الصداء ولاملاح الموجودة فى دورة التبريد اللى انت كنت بتحط فيها مية من الحنفية المفروض انت لو مبتستخدمش مية خضراء من اول ماشتريت العربية يبقى متغسلش دورة التبريد بأى مواد كيميائية او تحط مياة خضراء لانها هتبقى عملة زى مياة النار داخل الدورة بسبب تفاعلها مع الاملاح والصداء المترسبين داخل دورة التبريد لاكن كنت ممكن تغسل الرداتير عادى وبعدين تحط مياة مقطره ودى هتبقى افضل بكتير من المياة الخضراء فى مثل هذة الحالات .

يعني يا شباب لو الخرطوم الي موصل للاربة كنت لما افتح الكبوت الاقي بقللة كده يعني هواء بيخش الاربة والعربية فعلا كانت بتسخن جامد فعلا يعني هوه ده السبب لازم تبقى مفهاش تنفيس خالص ارجو الافادة.

متقلقش وان شاء الله تكون بسيطه
انا واحد صاحبي حصل معاه اللي انته بتقول عليه ده بالظبط واكتشفنا ان العيب هو طرمبه الميه
ونزلنا جبناها كانت بتاعه اوبل كورسا متهيالي ممكن يكون هو ده اللسبب عندك